عزيزي الشاب اللي داخل المطبخ ومشمر رجل البنطلون لحد فخاده وناوي تعمل أكل ...شوية نصائح عشان متطلعش من المطبخ على مستشفى الحميات:
1. عامل البوتاجاز زي مديرك في الشغل ... لحد ماتاخد غرضك منه
2. المكرونه مبتتغسلش
3. مينفعش تستبدل صلصة الطماطم بالكاتشب ... هاتبقى كإنك شلت ابو تريكه ودخلت مكانه محمود كهربا
4. متخليش النار عاليه عالرز ... هاتشم ريحه عامله زي ريحة شعر اخواتك البنات وهما بيعملوا استشوار ...هاتفتح الحله هاتلاقي الحله كلها عباره عن قعر
5. لو نفسك تاكل سمك جيبه من بره احسن .. جدتي كانت بتقول شراية العبد ولا تربيته
6. لو سلقت فراخ اغسل الحله بعد ماتاكل على طول عشان لو نسيتها لتاني يوم هاتصحى تلاقي ريحة واحد ميت في الصاله وهاتشيلها كلها وترميها في الزباله
7. وانت بتحط البطاطس في الزيت وخايف لا تتلسوع من الزيت افتكر والدتك وهي بتأكلك كل يوم بطاطس محمره .. ووطي شويه عالزيت
8. في حاجات كده نحبها أه نتجوزها لأ ... السوشي واحده منهم ... بلاش افكار متخلفه
9. التلاجه مبتوقفش الزمن ... الحاجات فيها بتحمض برضه بس على فتره طويله شويه
10. الحلاوه الطحينيه والمربى مبيتسابوش من غير غطى .. هاتصحى تلاقي فيهم على الاقل 4 مستعمرات نمل من 3 انواع مختلفه
11. متعملش محشي في البيت من نفسك ... خلي حد يعلمهولك او اتصل بخالتك وقولها انا هاجي اتغدى عندك بكره
12. مفيش زلال بيض بيتباع لوحده من غير الصفاره ... متضحكش الناس عليك
13. اللانشون لما بيبقى فيه دواير خضرا صغيره بيبقى باظ .. يعني مطلعلوش زتون فجأه
14. حاول الحاجه اللي تستخدمها تغسلها في نفس الوقت عشان متلاقيش نفسك يوم الجمعه بتتصل بام فتحي مرات البواب وتقولها الحقيني
15. الشوايه بتاعت الفرن مش بتعمل كباب وكفته وطرب .. دي اخرها بالنسبه ليك انك تحمر وش المكرونه بالبشاميل
16. الرز مبيتحطش عليه فلفل اسود وكمون عشان يبقى رز بالخلطه ...الخلطه دي امك بتقعد تعمل فيها ساعه .. يامغفل
17. متلعبش بالكبريت وترميه من البلكونه ... ممكن تلاقي جارك اللي تحت طالع وراسه فيها حته قرعه ..للأسف هاتضطر تبقى زيه لفتره
18. لو عايز تقطع بصل ومتعيطش وتبربر حط السكينه تحت الحنفيه قبل ماتقطع وكل اما تحس ان عينيك غرغرت اعمل كده ..ومتعيش الدور وتفتكر صاحبتك اللي فركشت معاها واتجوزت شاب طول بعرض بشنبات وعايش في دبي
19. متحطش هاند فري وانت بتطبخ .. انت مش في كايرو رانر
20 . لما تقدم الاكل حاول تستخدم اقل عدد من الأطباق عشان متغسلش كتير ...مش شرط تحط الورك في طبق والرز في طبق ..حط الورك عالرز ...انت في بيتك وبتاكل بالفانله
21. متفتحش النيش بتاع والدتك ... النيش ده مقدس ..مقدس ياسامي.. مقدس ...
تمت
منقوووووووووووووووووول